Scorpions Zet chu

Ni 16th zing khawvar engmawi tak ka han hmu chu rilru a thil helhhawlh lian tak nei ka nih a vang chuan ka tho phur at at hle a, sunday ani bawka, mutrei pawh tum chuang lo chuan hma tak maiah chuan ka tho a, rilru chu thil tih tur neih avang chuan a ni deuh huih mai a, vai naupang khawlaia cricket khel mai mai pawh chu pawm huam huam mai hi chakawm hliah hliah mai ani. Ka han kal vel te reng reng hi ka su deuh auh auh reng a, rilru hian hla hi ka sa veng veng mai ani.

Heti tak maia ka awm na chhan hi eng dang vang ni lovin kan thlahtu te atanga kan lo ngainat tawh, ka nu te pawn an hla an sak ve hlarh hlarh, ka pute a phei chuan mipui hmaah pawh an hla an lo sak pui ve hlawrh hlawrh tawh SCORPIONS ngei mai chuan kan in bul lawkah concert an rawn nei dawn tlat mai. An nin min rawn hreve a zeng pawh ni lo, ka lo phur ve em em ringawt mai a ni. Chhun a tang chuan ka helhhawlh bawk aniang engmah tih a tui tawh lo, tlai dar nga leh a chanve ah gate an hawng tan dawn tih chuah chu rilru ah a awm a, ka thil ti reng reng mai chu a lupan hnathawh tak meuh meuh a ni.

Hun chu a kal chak lo em em a, mahse dar nga chu eng ti tih in a mawni a lo ri ve mai a, ka kalpui tur ka thianpa nen chuan vawi engemawzat nge kan in phone hman tawh tih pawh chhut tham fe ani, a ni lah chuan rokhawlhna a la nei zui leh ta nghal a, ka hman hma dawn lo a rawn ti ta tlat mai a, kei heti tak maia lo helhhawlh tawh chuan kalsan bak chu rilruah a lang lo. Amaherawhchu kan tlai chuang lo ang min lo nghak hram hram rawh a tih tlat avang chuan lunghnur zet chuan ka lo nghak ta fan a.

Dar nga leh a chanve a lo ri a, ka phone sek tawh mai a, a ni chuan ka hman tep tibak chuan min chhang thei lo, "gate an hawng tan tawh aniaa" tia ka va vin deuh khur khur pawh chuan tih theih dang nei vak hek lo le, tum deuh bur chuan nghah a ngai tlat. Dar sarih a zai tan tur an ni a, keini anga dar sarih tih chuan dar sarih leh a chanve vela tan hman tawk tur ang chi kha niin ka hre bawk si lo a, mahse rilru in kan awmna a tangin a hlat chuang loh hi maw tiin ka inhnem chawp a, insiam sa at in ka vei thuak thuak reng tawh mai a ni.

Dar sarih alo rik chuan ka thianpa chuan a hman thu min rawn hrilh a, mahse a la rawn thlengphei lo. Ka va phone sek a, ka rawn kal mek a ti a, chuti chuan rei vak lo hnuah chuan a rawn thleng ve mai a, an zai tan tawh ngei ang le. kan awmna a tangin hla vak lo mahse kanhmanhmawh a vang chuan auto chu kan phar a, a driver lah chu lo induh phian a, a lo sawi to vel viau a, mahse pawi kan ti tawh lo, a hmanhmawh thlak tawh lutuk. Kan chuang lut rawih a, auto driver pawh chu hmanhmawh turin kan ti deuh chhen a.

Kan kalkawngah chuan kan thiandun chuan , "Amak ngawt mai, a hnai hle si, a ri pawh kan hre lo, Aizawl ah lem Petra te lo kal khan a khawpum deuh thaw khan a ri kan hria a" te kan ti vel a, a mak kanti ve hle. Palace Ground kan hriat chu kan thleng ta, a lo pui ut ut khawp mai a, ka vawikhat kalna a ni bawk a, a pui ka ti hle. An lo chei mawi em em mai a, kawng sir zawng zawng te chu decoration light hian an lo chei eng vek mai a, "Khai aw, a va vai em em ve le" tih pah chuan ngaihthat lohna nei lek lo chuan kan kal ta a. Kan phei zel a, a palace a pawh chu chiang tak hian kan va hmu a, two wheeler leh 4 wheeler in park chu a tam ngiang mai. Mihring pawh chhiar peih rual loh a tam hi an lo awm hmur mai a, mahse a hungna enmaw guitar ri fiak raih raih emaw engmah hmuh leh hriat kan nei lo a, ngaih chu tlem chuan a tha lo deuh. Mahse a zau tham em avangin kan la thleng tawi viau ah kan ngai mai a, "chubakah sound a chhuak tam lo aniang, open air chu ni tho mahse, a zau tham bawk sia" ti tea in hnem pah chuan kan pen phei lui zel a, kan phur tawh khawp mai, ka thianpa phei chu a su deuh auh auh reng tawh mai ani.

kan han thleng phei thui zel a, gate lianpui mai hi alo awm a, a chunga thil inziak kan han hmu chu ngaihthat lohna nasa tak kan nei ta. "Rajeev weds Pooja" tih hi lian lutuk mai, nasa taka chei mawi hian kan hmu ta. Rilru chuan beiseina tlem ala nei. "Hemi te hi an hausa lutuk anga, Scorpions hi an sponsored anga, an inneih ceremony a ni nghal a niang aa" tih te chu ring chuang miah lo hian rilru ah a lo lut a, kan nui tawi ta tak mai le. Kan han kal kual vel chhin a, a Scorpions lam reng reng hi a lang lo, kan music hriat chhun ber pawh chu vai music , sitar ri te leh dar leh khuang eng eng emaw ri bak a ni ta lo. Tah te hi a chhuak rum rum a, mahse beidawng lo chuan kan han kal kual zel a, traffic Police pakhat hi kan hmu a, kan han zawt rawih mai a, a ni chuan 'hei chu inneih ceremony a nia, chutiang lam chu sawlmah sawn circus tih na hmun a awm' tih pah chuan hmun thim deuh ruih lam hi min kawhhmuh a, chumi lam pan chuan pheikhai chu phur fahran hian kan han chhep ve leh thla ngawt a.

Kan pan lam chu a thim tawlh tawlh , a lo ngaw deuh khup mai a, ngaw luh hma chuan field a lo awm a, chutah chuan motor lian hnathawk chi hi an lo ngir khup mai a, a nih theih ngang loh avang chuan kan let leh ta a, duty pakhat hian whistle hi a rawn ham ri tuarh tuarh a, mahse min rawn pawh hma chuan kan kal chhuak hman ta hram a. Chutichuan kan luhna lam pan chuan beisei bo tak chuan kan phei leh ta chhat chhat a, mahse haw mai chu kan la tum hauh lo. Kawngpui kan va pawh leh chuan auto kan chang a,concert na hmun chu kan zawt zel a, anni auto pu tan chuan hriat a har ve deuh bawk aniang, an hriat loh bakah an kal risk duh lo hrim hrim a. ke chuan kan kal lui leh ta a, kan thian pa pakhat kan han phone a, a ni chuan 'khalamah anconcert ngai hlei nem' tih thu min rawn hrilh a, a awm na lam a sawi lamah chuan kan kal ta a, auto lah chu an kal duh der lo lehnghal, ke chuan kan kal tlauh tlauh a, a tawpah chuan kawng peng thuam lun tak hi kan va chhuak hlawl a, auto kan han phar ding thuai a, palace Ground concert awm na kan ti bawk a, a ni chuan confi fahran hian min phur a, a hma lawka kan kal na inneih na lamah bawk chuan min lo hruai leh chu niin, kan sawi buai vel peih ta lo a, haw mai te pawh a lang deuh tawh avangin. Inneihna kan va thleng chu "heihi ani lo, concert na zawk alom" kan ti a, mahse auto driver dang lo awm chuan a rawn hre ta a, a dik lam chu a hrilh ta a.

Kan phur thar leh ta, A awmna chu a hre ta kan driver chuan, kan phur tawh lutuk, kan kal tir ta chung chung a, Palace ground lehlam zawk lamah chuan kan inphur ta bauh bauh a, kan kal rei khawp mai. Auto pu pawh chuan advantage a lo la a, a kual thei ang ber chuan min la kal pui zui chu a lo ni. a meter lah chu a han kal chak em em khawp a, sawmpahnih a tang chuan sawmpanga ah a in pakai zawt zawt mai a, kan han complain ngial pawh chuan engual a sawt lo.

Chutah le, Scorpions concert na ngei mai chu kan thleng ta, hmanhmawh takin kan kal phei a, music ri pawh a dang ta zaih mai, Gate pui kan han lut phei chiah chu "Rock You Like A Hurricane" ngei mai chu a lo thlawh hlarh hlarh mai a, kan kal mai pawh ani lo, kan thlawk a ni titih deuh ber mai. kan zawm nghal nghal nghal mai a, a mawi ani, a lo sa thui viau tawh a, a hla chu a tawp ta der mai, "enge a sak leh ang aw?" tia rilru a ngaihtuah leh lai chuan, kei ngei pawhin a guitar a plucking zanwg zanwg nena ka thiam bel em em mai, lung te ka lo tih len ve viau tawh na thin hla, "When the smoke is going down" chu a rawn sa ta raih raih mai le, hnuk a ulh lo chauh ti ila kan uar lutuk angem aww..

Eng ti tih amaw chuan a sa zo leh mai, kei pawh chuan rilru leh tihtakzet chuan ka lo ngaithla ve a, awr phiar tawng tawng chuan ka lo zawm ve a ni. An sa zo chu min mangtha ta mai... rilru a va han zing em.. mipui lam chu "we want more" tiin an au rual thup thup a, a nuam kan va tirei lo em. Mahse thu ni tawh hek suh le, duh lo chunga kal a ngai ta si a, a kawtah chuan vur te chu kan ei ta mai mai a, a en ber niawm tak chuan an hla ho chu kan sa deuh hlarh hlarh reng a. Tichuan kalkawng tluan chuan kan sawi a, kan kham lo ani ber e. Mahse a bula tanga tawp thleng pawh khan lo en i la, kan kham chuang lo ang tia in hnem chungin in chu kan thleng ve ta mai a, rilru a ngaihtuah zui zel chung chuan mut zai te ka lo rel ve ta a ni. Mahse a nung chunga ka han hmu ve hrim hrim kha a ropui ka ti em em tho ani e.