Kan chan ta..

Date: 10th September 2010

7:30pm

“Pu ka thiante pawn an nei vek a, keimah chiahin ka nei ve lo, mawh pu, min lo lei .. mawh mawh” ti a Mathematical Instrument box Rambo lemchuang lei dil ngawng ngawng chung a dawr lam pana kan in kaih det det hi ka mitthla ah hian ala cham reng mai. A ni chuan ka duhzawng ka neih loh hi a duh lo a, ka thiante pawn an nei vek tak tak hlek lo a, a hre reng a, pawl hnih naupang in chutiang kan mamawh tak tak lo tih pawh a hre tho a, mahse ka thusawi vang pawh ni chuang lovin ka hlim a duh vang chuan min lei a tum ru reng tih pawh hre chuang lo chuan min kaihna lam ah chuan ka kal dawr dawr a, kal pahchuan ka la dil reng zel a, a ni chu kal hmawk hmawk pahin muang zawi sap hian, “Engzat man nge a?” a rawn ti a, keichuan phur fahran in “Sawmhnih man” ka lo ti vat a. Dawr chu kan thleng ta a, ka duh ang chu a nghak tu hnenah chuan a han zawt a, “Heihi ami i duh chu?” tih pah chuan box chu min han pe a, chu ta ka lawm hmel min rawn melh zeuh mai, ka hlim tih a hriat avanga a lawm hmel chu a hunlai khan lo hrethiam ila chuan a hlu lehzual tur. Ka pu pawh chu ngaihsak tawh lem lo chuan hlim lutuk chuan ka tlan haw san ta nal nal a..

Ka pu hi mihring taima lutuk ani, a tupa ka nih vanga sawi mai ka ni lova, a taima ani, mi awm hle hle thei lo, mihring harhvang zet mai hi ani a, tih tur a zawng reng mai mi ani a. Unau pathum anni a, a pa hian a unaute pahnih hi kut hna a thawh tir a, a ni hi lehkha a zir tir a, a unau te chuan an chawm ani, an inremsiam dan chuan a zirlai hian a unaute hian an chhawmdawl anga, a zir chhuah hnu ah a nin a unaute a chhawmdawl dawn ani. A tihtur hi a ti tha hle a, a fate mit tikham hial khawpin a unaute hi a ngaihsak ani. A tleirawl chhuah vel chanchin hi ka zawt mai mai thin a, tleirawl sual pawh nei lem lo, lehkha zir a, Pathian thu ngaihsak tawp mai chi hi ani a, ka pi nen an intawn dan chanchin vel sawi phei hi chuan a nuih hi a za thin, anhun lai a zirtirtu an to zia chu ka hrethiam ve phak kher lo. Ka pi lah hi a lo duai lo, a dang a hmuh zawh zia hi a losawi ve thin a, kan hlim thei dar dar hle. Zu pawh hi vawikhat chu a tem ve tawh thu a sawi a, chu pawh zu ani tih a hre lo a a tem thu a sawi a, zuk leh hmuam engmah ti lovin kum heti zat hi alo dam ani.

Kum 1999 khan ka pi nena an inneih Golden Jubilee kan hmang a, 2009 khan an Diamond Jubilee kan hmang leh a, Pathian malsawm na an dawng em em a, fa sawm an nei a, tun thleng hian tumah la boral lovin an la dam kim thap mai a ni. Ka pi nen hian an inngai em em a, nikum vel atang khan ka pi hia bawksawp tan a, ka pu pawh hi khup na nei anih avang in a awprawp ve hle tho a, mi inthlahrung lutuk mi niin midang tihbuai hi an hreh hle a, nikum ka pi theihloh zual lai te chuan an pahnih hian thei leh thei lo hian an lo in bawihsawm a, zunram thiar ilo fahran ah te, midang ko mai ta lo chuan an lo inbuaipui ve hram hram zel a, khawiah mah an dah hran theih loh a, an inngai ngawih ngawih mai ani. Hmanni lawk pawh khan ka pi nen kan inbiak chuan “I pu hi min kalsan hmasa mai ang tih ka hlau emai, tunah te hian a len dawn hlek pawn ka ngai em em zel a”, a tih chuan ka rilru a tina hle a. Nikum Christmas kha ka nu nen kan han hmanpui a E.Lungdar lamah, Christmas ruaitheh na velah te khan a kal ve chak a, a lo han kal ve a, ka pi chu a lo titau a, lehlam hi alo hawisan a, ka nuih hi an ti za hle a, ka pi chu ka bulah hian alo vui nasa mai a, ka nui nasa khawp mai. Hetiang khawpa an in ngaih avang hian tun tuma a damloh pawh hian civil hospital ah ka pi hi a bulah an mut tir ve tawp a, a na tuar vel chu ka pi hian hnuk ulh teuh chung hian, “Ka va han lainat em ka thiana chu” a ti ngawih ngawih mai ani awm e. Thiani, Thiana ti hlir hian an in ko thin.

Hmanni deuh khan a damlo tih kan hre tran a, ka nu hian Aizawl lamah an rawn phur thlak thu min rawn hrilh a, a serious vak pawh kan hre chuang lova, biak pawh han be lem lo chuan a chanchin chu nitin mai hian ka nu chu ka han zawt ve ziah ringawt a, a thatloh vak thu min rawn hrih ngai lova, ngaihthat lohna pawh kan nei lemchuang lova, rilru hah na chhete mah hi ka neih miah lo, a chhan chu, ka pu hi thi thei turah hian ka ngai ngai lo re re, a thi tur ang deuh pawh hian ka ngaihtuah chhin thiam lo ani. A damlo fova , a lo dam leh mai ang ti hian ka ngai ve ngawt mai ani. Ka putea te pawh ka han zawt a, a ni pawhin a tha ve leh mai ang, thisen te an pe a, a zia khawp mai a lo ti mai a. Nimin chhun ka chhuak a, auto a chuang pahin ka nu chu ka pu chanchin zawt turin ka han call a, a aw chu alo ngui khawp mai a, “nachin deuh khan a mitmeng te a rawn danglam a, hei tunah oxygen te an pe a, nachhawkna in an chiu muhil a, a harhchhuah hi kan ring vak tawh lo” a rawn ti chuan min deng kher mai. Sehchilh deuh nuaih, tha khur der der hian, “Engtia harh chhuah in maw?” tiin ka rilru tak chuan thih lampang a la lang chuang lo, ka ngaihdan chuan tun maiah chuan a tawng peih lovang tihna ang deuh ah ka ngai lui deuh a, mahse ka nun a rawn sawi chian tak em avang chuan hai der luih theih ani ta lo, ka mit atang hian mittui lum pap mai chu dan rual loh hian a rawn chhuak nghal a, auto chuan lai pawh nise insum ngaihna a awm lo, mitthla ah ka pu nen kan titi lai te, a thu min hrilh zawng zawng te a rawn lang uarh uarh mai. Mahse thi tur hian ka rilru ah a la awm tak tak chuang lo. Ka awih thei thlawt lo ani. In ka thleng a, phone ngaichang titih, a rawn ri ang tih hlauthawng tak si hian ka awm reng a, ka cousin pakhat chu ka han call a, a nichuan tap aw titihhian a mak a tih thu bak a lo sawi lo a. Khawthim thleng chuan eng thawmmah ka hriat tak lovahchuan kangaihthatlohna te chu a reh deuh a, a dam leh mai turah ka ngai tlat ani.

Zan dar 7-8 vel ani, a dar zat chian ka hre lo, ka phone chu alo ri ral ral a, ka nu number a ni lo a, ka cousin number ani a, hlauthawng titih, la lo ngam bawksi lo hian ka han la chu ka nau chuan tap chung hian, “U Zaute, Pu kan nei ta lo” a rawn ti. A va na em. Sawi tur ka hre lo, ka a vek hian ka hria, ka bing mup mup a, enge ka ngaihtuah pawh ka hrelo, ka mit deuh sulh an tih ang hi a ni ber ang chu, awm ngaihna ka hre lo, kan inbiak zui dan pawh ka hre lo, ka phone lo ri leh chuan min tiharh zawk a, ka nu number hi alo ni a, kan nau pakhat hian min rawn hrilh leh a, chutah chuan insum thei rual ka ni ta lo, zah pawh dawn lovin a ri meuh hian ka tap chhuak ta hawm hawm a, hetiang renga lungchhiat hi ka la hre ngai lo. Mi te pawn an pu te an chan a, an nu leh pa te hial pawh an chan a, mahse mahni chunga a lo thlen hian a dan alo va dang em, hetiang reng hian ani maw alo nat tih chu ka hre ve ta. Sawi ngaihna a awmlo a na ani. kha mi hnu lam thil kha chu ka hre zui mang tawh lo.

Thianpa C-a pawhin a theih theih ka thian te a lo hrilh kual a, a chungah ka lawm hle a, thiante hi an lo ngaih theih zia pawh ka hre ta, thiante chhung te chhiat tawh thu hi chu a hrilh kual tu ah hian ka tang ve fo tawh a, amaherawhchu an hrilh kual sak nih chu a lo danglam khawp mai. Ka thiante aizawl lam ami te pawhin an lo tawiawm a, thiante pawimawh zia hi ka hrechiang tulh tulh mai. Min lainat tu te chungah hian lawmthu nasa takin ka sawi mawlh mawlh a ni e.

Ka pu chu he khawvelah hian awm tawh lo mahse, a pa hnenah, nat leh hreawm, rilru hahna awm tawh loh na hmunah min chawlhsan tawh a, mi te tan chuan putar satliah mai ni mahse kan tan chuan pu ropui ber ani a, a ni ang pu dang hi khawi ah mah kan nei leh tawh ngai lovang. Ka Pu Ka ngai ngawih ngawih che....