Speed Post

Dt 8th February 2011 zing dar sawm pakhat velah Speed post bangalore, St Thomas Town Post atang chuan ka chhungte leh ka thian te percel va thawn tur chuan ka in line ve vang mai a, naupang rubber sana tih angrel vel chu niin Rs 5500 man hu vel a ni a, a sana hi 55pieces vel ani. KG khat pawh a tlin chiah loh avang chuan a thawn man chu Rs 111 a ni a. Ngaihthat lohna pawh nei lem lo chuan ka thawn a, ka haw san ve leh mai a. In lam atang erawh a thlen thuai thuai ka nghah hlelh avangin an website atang a track na ah chuan ka track chhen a.

Ni 15 a lo nih chuan ka thawh hlimah ka tih dan pangngaiin ka thil thawn chu ka han trace leh a, aizawlah an received thu leh BAG is Opened a lo in tih vang a vang chuan ka thian pa chu call nghal in lo ngaihven turin ka ti a, ani chu va kal nghalin a hmun atang chuan min lo call a, an hmuhzawh mai loh thu te sawiin a bawm awmdan te kan han inhrilhfiah ngial a. Rei tak an zawn hnu pawh chuan an hmuh tak mai loh avang chuan manual a an thawn chhuah anih an ring a, ka thianpa chu a phone number te dilin tlai ah an biak tur thu an lo hrilh a. A bo ang tih ngaihna reng ka la ring pha lo.



Tlaiah chuan an lo phone tak si loh avangin ningani thleng chuan a va ngaihven zel a, an han zawng ngial hlawm a, an hmu zo ngang si lo, ka thianpa lo hman lo ve bawk si chu ka thian pa dang chu lo ngaihven turin zirtawpni chuan ka han ngen leh tawp mai a. A ni pawh chu a bei a dawng hle a, an sawi dan ngai bawkin a phone number an lo dil a, an lo biak tur thu an lo hrilh ve leh mai a. Inrinni pawh chuan thuthar engmah a awm tak si loh avang chuan Dt 22nd, thawhtan ni chuan a va kal leh a, AN pu ber chuan a beidawng takzet thu te, tih ngaihna ngang a hriat loh thu te, amah ngeiin a zawng a, a ngaihna a hriat loh thu te, an record zawng zawng, lut leh chhuak ah a lang si loh thu te, a bag ah hian an rawn thun hmaih anih a rin thu te, an register zawng zawng ah a hmuh loh thu te a lo hrilh a. An dan ah chuan a thawn man let an pek thin mai thu te alo hrilh a. Tin, ka thianpa hnenah chuan,"Hetiang hi ka awm hnu ah ka la tawng ngai lo a, rawn ti fel hma ula ka duh khawp mai" a lo ti nghe nghe a. A bag ah chuan lo tel lo pawh ni se a lut leh chhuak chu an record ve thlap ngei chu ka ring tho va.

Chung thu ka han hriat chuan ka rilru chu a hnual deuh rawih a, kar khat chhunga an chinfel theih loh chu thuhran, Rs 5500 man vela a thawn man let Rs 222 min offer bakah tifel thuai tura min hrilh chu ka lawm lem lo hle a, an website atanga track na ah pawh aizawla received a in tih kalh tawh avang chuan an thiamloh niin ka hre ve tlat si a. kan ngawih bo pui mai chuan a item ka ui mai bakah nakin lehzel ah midang zel tan pawh a tha ber lova ka hriat tak avang in ka chhung te chu ka nutei te thenawm advocate chu lo be rawn turin ka ti a, an ni chuan 23rd Feb zing karah lo zuk be rawn in, ani chuan FIR thehluh mai a chi ang tiin FIR chu alo draft sak nghal zung zung a.

Ka nu chu Police station a kal hma chuan ka thianpa thurawn angin Post Office lam chu a va be ve leh ta hrim hrim a, ani chuan, "Mi tan chuan tam tham ni lo mahse keini tan chuan a tam riau a, mahni dinhmun a chanin in hriat thiam tho ka ring", ti chungin FIR a thehluh dawn thu chu a va hrilh a, a ni chuan,"Rs 1000 te chu ni se kan han thawh khawm mai tur ani a, Rs 5500 em em chu a tam deuh si a, tin chu bakah Bangalore lamah lo claim tum chhin teh u" a rawn ti a, ka nu hnenah chuan,"thehlut lo phawt teh, helam ka thawnna ah kan kal ve leh hrim hrim ange" ka ti a, min lo la nghak a. Ka thianpa bula Rs222 chu Rs 1000 ah a kai ta anih ber chu.

Bangalore lam dak in ah chuan ka va kal leh ta a, a chhung ka lut post master hmuh ka dil chiah chu ka phone a rawn vibrate a, banga "switch off your mobile" tih intar ka hmuh avang chuan ka tlan chhuah pui a, ka thian pa, ka han address ber a chuan, "hei an hmu a, rawnlam rawh u min ti" a rawn ti ta heu mai a. Ka lawm em em tho chu thuhran ni se, ka nuih a za deuh tlat a, "FIR theh luh dawn meuh chuan an va hmu rang lawi si ve, niminah mama kha an lo chhang beidawng riau si a" ka han ti nghe nghe a. Tichuan lawm tak chuan an va la ta mai a. Ngaihtuah chian chuan nuih zatthlak riau in ka hria.

Hetia ka ziah chhuai na chhan hi anmahni ka va beihna ngawr ngawr ni lovin, Speed post te hi kan ram tan a tha em em a, mipui tamzawkin kan hmang tangkai a, hetiang thil thleng te hi awm ve leh zauh zauh thin a, a tam zawk chuan kan ngawih liampui mai thin a, mahse nakin zelah midang la hmang tangkai tamtak te tan, a thawkte lo fimkhur zual theih nana rawn ziak ka ni e.